کریم خرم: نشست امنیتی هرات در تاجیکستان بی محتوا است

رئیس دفتر رئیس جمهور پیشین افغانستان ضمن بی‌محتوا خواندن نشست امنیتی هرات، از دولت موقت طالبان خواست تا نسبت به پیامدهای چنین نشست‌هایی هوشیار باشند.

به گزارش دفتر منطقه‌ای خبرگزاری تسنیم، «عبدالکریم خرم»، رئیس دفتر دولت پیشین افغانستان در صفحه توئیترش «نشست امنیتی هرات» در شهر «دوشنبه» پایتخت تاجیکستان را خالی از محتوا خواند، اما آن را مانند «سفر و چادر حنا ربانی پر از نماد» دانست.

عبدالکریم خرم همچنین «مذاکرات بین‌الافغانی» را به طعنه «خرابی بین‌الافغانی» خواند و مدعی شد که این مذاکرات سبب دست بالا داشتن پاکستان شده است.

وی با هشدار بر اینکه نباید این سناریو در کشور دیگری تکرار شود، از دولت موقت طالبان خواست تا «بیدار شوند».

دهمین دور گفتگوهای امنیتی هرات با محوریت «نظام سیاسی همه‌شمول؛ الگوها و نقشه راه» با حضور برخی از چهره‌های سیاسی، کارشناسان و پژوهشگران داخلی و خارجی در شهر دوشنبه پایتخت تاجیکستان درحال برگزاری است.

در این نشست علاوه بر مقامات افغان نمایندگان 17 کشور جهان در سطوح مختلف حضور دارند و مسائل و راه‌کارهای خود را ارائه می‌کنند.

نشست امنیتی هرات واکنش‌هایی نیز به همراه داشت، «عبداللطیف پدرام»، عضو پارلمان پیشین افغانستان در این نشست نکرد، وی اعضای شرکت کننده در نشست تاجیکستان را «بقایای رژیم فاسد اشرف غنی» عنوان کرد.

«طارق فرهادی»، آگاه امور سیاسی نیز دراین‌باره اظهارداشت: افرادی که در این نشست شرکت کرده‌اند، کسانی هستند که در زمان جمهوریت بدون در نظر داشت حقایق افغانستان، صلح با طالبان را نمی پذیرفتند و بر دوام جنگ تاکید داشتند».

این نشست از سال 2012 میلادی همه ساله توسط «مؤسسه مطالعات استراتژیک افغانستان» در هرات برگزار می‌شد، اما امسال، پس از سقوط جمهوریت، برای نخستین بار به میزبانی کشوری دیگر برگزار می‌گردد.

انتهای پیام/.